له شاوخوا دوه نیم سوه تنو ځوانانو څخه نن جمعه (۱۴۰۴/۵/۳۱ ل.) له کندهار پوهنتون څخه د راغلي هیئت په حضور کي اته ویشتم عمومي کانکور واخیستل سو.
د محصلانو د خدماتو انسجام آمر ښاغلي عبدالواسع هڅیال د ویناوو برخه را پیل او ټولو کاندید محصلانو ته یې ښه راغلاست ووایه، ورپسې یو تن کاندید محصل د قرآنکریم لنډ آیتونه تلاوت کړل.
عمومي رئیس ښاغلي مولوي رحمت الله نیازي پیلیزه وینا وکړه او وې ویل: « تاسو د ملالۍ لوړو زده کړو مؤسسې په انتخابولو سره د خپل علمي سفر نیکمرغه پیل کړی دئ، له خپلې ځوانۍ، وخت او موجوده امکاناتو څخه باید هر ځوان ګټه واخلي او وطن ته د خدمت مصدر وګرځي. زموږ اداره او مسؤلین ټول ستاسو د ښه خدمت کولو لهپاره هر وخت چمتو دي. »
له کندهار پوهنتون څخه د راغلي هیئت په استازیتوب ښاغلي پوهنمل دوکتور نقیب الله حقبین وینا وکړه او وې ویل: «هر ځوان مکلف دئ چي له وخت او وسایلو څخه تر ټولو مؤثره ګټه واخلي، زموږ وطن لېسانس، ماسټر او دوکتورا لرونکو کادرونو ته شدیده اړتیا لري تر څو له موجوده ستونزه سره مبارزه وکړای سي.»
د کانکور پارچو بکس د مؤسسې رهبري هیئت او کندهار پوهنتون څخه راغلي پلاوي په حضور کي د یوه تن کاندید محصل لهخوا خلاص سو، د ازمویني هیئت مسؤلینو ته پارچي ووېشلي او ازموینه رسماً پیل سوه.
د محصلانو چارو مرستیال او د آزموینو کميټې آمر ښاغلي محمد الیاس کریمي د پوښتنو حلولو اړوند پوره معلومات له کاندید محصلانو سره شریک کړل.
د ازمویني له صحني څخه د کندهار پوهنتون د محصلانو چارو مرستیال ښاغلي مولوي نور احمد ایوبي او د محصلانو چارو آمر ښاغلي رحمت الله رښتین د نظارت په موخه لیدنه وکړه.
د ملالۍ لوړو زده کړو مؤسسې ۲۸ ام عمومي کانکور له هغو سلګونو کاندید محصلانو څخه واخیستل سو چي د طب، حقوقو، سیاسي علومو او نړۍ والو اړیکو له پاره یې نوم لیکني کړي وې.
د یادولو وړ ده چي د عمومي کانکور نتایج به د دې اونۍ په پای کي اعلان سي.
#ملالۍ_له_تیارو_څخه_رڼا_ته!
ویب پاڼه: www.Malalay.edu.af
فېسبوک او انسټاګرام: Malalay.mihe
ټوېټر: Malalayedu
لنکډان: Malalay University
یوټیوب: Malalay University
