د ۱۴۰۵ ل. کال په اګزټ آزموینه کي د ملالۍ پوهنتون طب پوهنځي کامیاب سوو ډاکټرانو ته نن یکشنبه (۱۴۰۵/۸/۱۱ ل.) د مسلکي پرمختيايي مرکز په تالار کي ستاینغونډه دائره سوه.
مجلس د کلامالله مبارکو آیتونو په تلاوت پیل سو، ښاغلي عبدالواسع هڅيال کامیابانو ته د مبارکۍ مقدمه وړاندي کړه او مجلس رسماً پیل سو.
د ملالۍ پوهنتون رئیس پوهنیار ډاکټر نور خالق نور د پیلیزي وینا په ترڅ کي کامیابانو ته مبارکي وویله؛ د مسلکي هڅو سپارښتنه یې ورته وکړه، ښاغلي نور وویل چي افغانستان په ډېرو روغتیايي برخو کي مسلکي او روزلي کادرونو ته اړتیا لري.
همدارنګه د ملالۍ پوهنتون د ماموریت اعلامیه یې ورته تشریح کړه، د دعوت او ارشاد مهم فرمانونو لنډیز یې بیان کړ، د چاپېریال ساتني او نشه يي توکو د نه استعمال سپارښتني یې ګډون والو ته وکړې.
ورپسې د طب پوهنځي رئیس ښاغلي ډاکټر محمد اسمعیل سادات خبري وکړې؛ د طب په برخه کي موجوده ستونزو ته اشاره وکړه او له ټولو ډاکټرانو یې وغوښتل چي په خپلو راتلونکو پلانونو کي ځای ورکړي.
د فارغ ډاکټرانو په استازیتوب ډاکټر محب الله تائب خبري وکړې؛ له پوهنتون او استادانو یې مننه وکړه.
د پروګرام په وروستیو کي د ملالۍ پوهنتون له خوا ډاکټرانو ته چمتو سوي ستاینلیکونه او ډالۍ ورکړل سوې چي له هغو وروسته مجلس د دعاء په ویلو سره پای ته ورسېد.
#ملالۍ_له_تیارو_څخه_رڼا_ته!
ویب پاڼه: www. Malalay.edu.af
فېسبوک او انسټاګرام: Malalay.mihe
ټوېټر: Malalayedu
لنکډان او یوټیوب: Malalay University
