د روزګان ولایت پوهنتون استادانو، اداري کارمندانو او د بېلابېلو پوهنځیو محصلانو د خپل علمي سیر په بهیر کي تیره دوشنبه (۱۴۰۵/۷/۲۰ ل.) له ملالۍ پوهنتون څخه لیدنه وکړه.
راغلو مېلمنو ته د علمي شورا په تالار کي د بدرګه کولو مجلس دائر سوی و، د محصلانو چارو مرستیال ښاغلي ن. پوهنیار محمد الیاس کریمي راغلو مېلمنو ته ښه راغلاست ووایه، د پوهنتون په اړه یې لنډ معلومات ورکړل او د پوهنتون د راتلونکو پلانونو په اړه وږغېد.
له هغه وروسته د روزګان پوهنتون په استازیتوب ښاغلي پوهندوی سید ولي صدیقي خبري وکړې، د پوهنتونونو ترمنځ یې ګډي علمي اړیکي وستایلي او زیاته یې کړه چي دا ډول اړیکو د دواړو لورو له پاره د تجاربو شریکولو لوی فرصتونه برابروي.
اداري شعبې، خدماتي مراکز، عمومي کتابتون او کمپیوټر لب، د طب پوهنځي عملي کار ځایونه، د حقوقو او سیاسي علومو پوهنځي عملي کار ځایونه او لوبغالي هغه ځایونه وو چي د راغلو مېلمنو له خوا وکتل سول او د اړوند ادارو مسؤلینو خپل معلومات له مېلمنو سره شریک کړل.
په پای کي د روزګان پوهنتون راغلو مېلمنو د ملالۍ پوهنتون له مېلمه پالني مننه وکړه او زیاته یې کړه چي د ملالۍ پوهنتون په لیدو خوښ سول چي دا ډول علمي بنسټونه په افغانستان کي تحصیلي خدمات وړاندي کوي.
#ملالۍ_له_تیارو_څخه_رڼا_ته!
ویب پاڼه: www.Malalay.edu.af
فېسبوک او انسټاګرام: Malalay.mihe
ټوېټر: Malalayedu
لنکډان: Malalay University
یوټیوب: Malalay University
